دعا ہے جج ہمت کرکے انصاف دیں اور سزاؤں کو غیر قانونی قرار دیں، محمد آصف سعید ایڈووکیٹ
چیف جسٹس اسلام آباد ہائی کورٹ سرفراز ڈوگر ہماری اپیل سننتے ہی نہیں، محمد آصف سعید ایڈووکیٹ کی میڈیا سے گفتگو
اسلام آباد(یواین پی) رہنما پاکستان تحریک انصاف محمد آصف سعید ایڈووکیٹ نے کہا ہے کہ دعا کر سکتے ہیں کہ ججز ہمت کرکے انصاف دیں اور جو سزائیں دی گئی ہیں انھیں غیر قانونی قرار دیں۔سپریم کورٹ کے باہر میڈیا سے گفتگو کرتے ہوئےمحمد آصف سعید ایڈووکیٹ نے کہا کہ بانی پی ٹی آئی کے 9 مئی کے کیس میں سپریم کورٹ میں آئے تھے، اگلے ہفتے تک اپیلیں لگ گئیں ہیں، اسلام آباد ہائیکورٹ میں القادر ٹرسٹ کیس کی اپیل نہیں لگ رہی ہے۔ان کا کہنا تھا کہ چیف جسٹس اسلام آباد ہائی کورٹ سرفراز ڈوگر ہماری اپیل سننتے ہی نہیں ہیں، یہ شکر ہے سپریم کورٹ نے 19 اگست کی تاریخ دیدی ہے، جھوٹی گواہیوں پر ایف آئی آر درج کی گئی، ان جھوٹی ایف آئی آر پر تو انھیں جیل میں ڈالنا چاہیے۔محمد آصف سعید ایڈووکیٹ نے کہا کہ دعا کر سکتے ہیں ججز ہمت کرکے انصاف دیں، جو سزائیں ہوئی ہیں انھیں ججز غیر قانونی قرار دیں۔
